БРАТСТВО ВО ИМЯ ВСЕМИЛОСТИВОГО СПАСА

Информационный листок N 10. Декабрь, 1992 г.

        На общем собрании Братства 17 июня 1991 года было принято решение каждое третье воскресение месяца собираться всем приходам Братства на общую молитву и просить Господа об умножении любви и помощи в "преодолении ненавистной розни мира ceгo".Чuнonocлeдoвaнue мoлебного пения включает канон молебный Пресвятой Богородице с акафистом Иисусу Сладчайшему. Молебен совершается собором священников Братства, Хоры Братских храмов поют канон и акафист. Служба совершается по очереди в храмах Братства: Николо-Кузнецком, Царевича Димитрия при 1-й Градской больнице и Благовещенском храме, расположенном за Путевым Петровским дворцом. Уже полтора года молебен служится каждый месяц, собирая все большее число молящихся.

Братское молебное пение
О УМНОЖЕНИИ ЛЮБВИ

        Иерей: Слава Святей, и Единосущней, и Животворящей, и Нераздельней Троице всегда, ныне и присно и во веки веков.

       

Аще не совершалась вечерня, то обычное начало.

       

Псалом 117

Исповедайтеся Господеви, яко благ, яко в век милость Его. Да речет убо дом Израилев: яко Благ, яко в век милость Его. Да речет убо дом Ааронь: яко Благ, яко в век милость Его. Да рекут убо вси боящиися Господа: яко благ, яко в век милость Его. От скорби призвах Господа, и услыша мя в пространство. Господь мне Помощник, и не убоюся, что сотворит мне человек. Господь мне Помощник, и аз воззрю на враги моя. Благо есть надеятися на Господа, нежели надеятися на человека. Благо есть уповати на Господа, нежели уповати на князи. Вси языцы обыдоша мя, и именем Господним противляхся им, обышедше обьщоша мя, и именем Господним противляхся им, обыдоша мя, яко пчелы сот, и разгорешася, яко огнь в тернии, и именем Господним противляхся им. Отриновен превратихся пасти, и Господь прият мя. Крепость моя и пение мое Господь, и бысть мне во спасение. Глас радости и спасения в селениих праведньш: десница Господня сотвори силу, десница Господня вознесе мя, десница Господня сотвори силу. Не умру, но жив буду, и повем дела Господня. Наказуя наказа мя Господь, смерти же не предаде мя. Отверзите мне врата правды, вшед в ня исповемся Господеви. Сия врата Господня, праведниц вниидут в ня. Исповемся Тебе, яко услышал мя еси, и был еси мне во спасение. Камень, егоже небрегоша зиждущии, сей бысть во главу утла: от Господа бысть сей, и есть дивен во очесех наших. Сей день, егоже сотвори Господь, возрадуемся и возвеселимся в онь. О Господи, спаси же, о Господи, поспеши же. Благословен грядый во имя Господне, благословихом вы из дому Господня. Бог Господь, и явися нам: составите праздник во учащающих до рог олтаревых. Бог мой еси Ты, и исповемся Тебе, Бог мой еси Ты, и вознесу Тя. Исповемся Тебе, яко услышал мя еси, и был еси мне во спасение. Исповедайтеся Господеви, яко Благ, яко в век милость Его.
Аллилуйя, аллилуйя, аллилуйя, слава Тебе Боже (трижды)

       

Великая ектения

Диакон: Миром Господу помолимся.
Хор: Господи, помилуй (на каждое прошение).
О Свышнем мире и спасении душ наших. Господу помолимся.
О мире всего мира, благостоянии Святых Божиих Церквей и соединении всех, Господу помолимся
О святем храме сем и с верою, благоговением и страхом Божиим входящих в онь, Господу помолимся.
О великом Господине и Отце нашем Святейшем Патриархе Алексии, честнем пресвитерстве, во Христе диаконстве, о всем притче и людех. Господу помолимся.
О Богохранимей стране нашей и о спасении ея, Господу помолимся.
О граде сем, всяком граде, стране и верою живущих в них, Господу помолимся.
О благорастворении воздухов, о изобилии плодов земных и временех мирных. Господу помолимся.
О плавающих, путешествующих, недугующих, страждущих, плененных и о спасении их, Господу помолимся.
О еже труждающимся делателем благую помощь во всем подати и дела рук их исправити и в совершение силою, действом и благодатию Пресвятого Духа спешно произвести, Господу помолимся.
О еже милостиво прияти благодарение и мольбу нас недостойных рабов Своих в пренебесный Свой жертвенник и помиловати нас, Господу помолимся.
О еже очистити нас от грехов и беззаконий наших, прилежно Господу помолимся.
О еже всеяти в нас благодатию Пресвятаго Духа новую Свою заповедь, еже любити друг друга, и не себе угождати, Господу помолимся.
О еже искоренити в нас ненависти, зависти и вражды, и вся прочия страсти, братолюбие разрушающая. Господу помолимся.
О еже искоренити в нас страсть самолюбия, братолюбия же добродетель возрастити, сердцем сокрушенным Господу помолимся.
О еже не любити нам миpa, ни яже в мире, но Бога и славу Его, и ближняго своего пользу и спасение возлюбити, Господу помолимся.
О еже научити нас не точию други и братию нашу, но и враги наша истинно любити и молитися за творящих нам напасть, Господу помолимся.
О еже себе внимати и своя согрешения всегда зрети, пред Богом и людьми смирятися, брата же николиже осуждати, Господу помолимся.
О еже теплую любовь в нас к Богу и ближнему своему, благодатию Пресвятаго Духа распалити, и тою навеки друг другу и Церкви Своей ны соединити, Господу помолимся.
Заступи, спаси, помилуй и сохрани нас, Боже, Твоею благодатию.
Пресвятую, Пречистую, Преблагословенную, Славную Владычицу нашу Богородицу и Приснодеву Марию со всеми святыми помянувше, сами себе и друг друга, и весь живот наш Христу Богу предадим.
Хор: Тебе, Господи.
Иерей: Яко подобает Тебе всякая слава, честь и поклонение, Отцу и Сыну и Святому Духу, ныне и присно и во веки веков.
Хор: Аминь.

Диакон: Бог Господь, и явися нам, благословен грядый во Имя Господне.
Стих 1: Исповедайтеся Господеви, яко благ, яко в век милость Его.
Стих 2: Обышедше обыдоша мя, и Именем Господним противляхся им.
Стих 3: Не умру, но жив буду, и повем дела Господня.
Стих 4: Камень, его же небрегоша зиждущии, сей бысть во главу угла: от Господа бысть сей, и есть дивен во очесех наших.
Глас 8:
С вышних призираяй, убогия приемляй, посети нас озлобленныя грехи, Владыко Всемилостиве приими рождшую Тя Богородицу, молящуюся за ны и спаси, Спасе наш, люди отчаянныя.
Слава, глас 4:
Союзом любве апостолы Твоя связавый, Христе и нас Твоих верных рабов к Себе тем крепко связав, творити заповеди Твоя, и друг друга любити нелицемерно сотворив молитвами Богородицы, ЕдинеЧеловеколюбче.
И ныне, глас 4:
Век скончавается, любовь оскудевает, победу лукавый торжествует, и кто нам помощи может, аще не Ты, Дево, Чудная Мати, оградиши Крестом Сына Твоего.

Запевы Иисусу Сладчайшему,
Пресвятой Богородице, святым Братских храмов и иным,
аще изволят служащие:

ИисусеСладчайший, спаси нас.
Пресвятая Богородице, спаси нас.
Святителю отче Николае, моли Бога о нас.
Святителю отче Тихоне, Патриарше Всероссийский, моли Бога о нас.
Святителю отче Митрофание Воронежский, моли Бога о нас.
Святый благоверный царевичу Димитрие, моли Бога о нас.
Преподобные отцы наши Сергие и Серафиме, молите Бога о нас.
Святые священномученицы Владимире и Вениамине, молите Бога о нас.
Святый праведный отче Иоанне Кронштадтский, моли Бога о нас.
Святая преподобномученице Елисавета, моли Бога о нас.

По сем:
Спасителю:
Избави от бед рабы Твоя. Владыко Всемилостиве, яко мы усердно к Тебе прибегаем, милостивому избавителю всех владыце Господу Иисусу.
Богородице: Спаси от бед рабы Твоя, Богородице, яко вси по Бозе к Тебе прибегаем, яко нерушимой стене и предстательству.
Призри благосердием, всепетая Богородице, на мое лютое телесе озлобление и исцели души моея болезнь.
Святым: Молите Бога о нас, вси святии яко мы усердно к вам прибегаем, скорым помощникам и молитвенникам о душах наших.

Канон (глас 8)
Песнь 1

Ирмос: Воду прошед яко сушу и египетскаго зла избежав, израильтянин вопияше: Избавителю и Богу нашему поим.
Пресвятая Богородице, спаси нас.
Многими содержим напастьми, к Тебе прибегаю, спасения иский: о Мати Слова и Дево, от тяжких и лютых мя спаси.
Пресвятая Богородице, спаси нас.
Страстей мя смущают прилози, многаго уныния исполнити мою душу: умири, Отроковице тишиною Сына и Бога Твоего, Всенепорочная.
Слава Отцу, и Сыну, и Святому Духу.
Спаса рождшую Тя и Бога, молю, Дево, избавитися ми лютых: к Тебе бо ныне прибегая простираю и душу и помышление.
И ныне и присно и во веки веков, аминь.
Недугующа телом и душею,посещения Божественнаго, и промышления от Тебе сподоби, едина Богомати, яко благая, Благаго же Родительница.

Песнь 3

Ирмос:
Небесного Круга Верхотворче Господи, и Церкве Зиждителю, Ты мене утверди в люобви Твоей, желаний краю, верных утверждение, едине Человеколюбче.
Предстательство и покров жизни моея полагаю Тя, Богородительнице Дево: Ты мя окорми ко пристанищу Твоему, благих виновна, верных утверждение, едина Всепетая.
Молю, Дево, душевное смущение и печали моея бурю разорити: Ты бо, Богоневестная, начальника тишины Христа родила еси, едина Пречистая.
Слава: Благодетеля рождши, добрых виновнаго, благодеяния богатство всем источился бо можеши, яко сильнаго в крепости Христа рождши, Богоблаженная.
И ныне: Лютыми недуги и болезненными страстьми истязаему, Дево, Ты ми помози: исцелений бо неоскудное Тя знаю сокровище, Пренепорочная, неиждиваемое.

Седален, глас 2

Моление теплое, и стена необоримая, милости источниче, мирови прибежище, прилежно вопием Ти: Богородице Владычице, предвари, и от бед избави нас, едина вскоре предстательствующая.

Песнь 4

Ирмос:
Услышах, Господи, смотрения Твоего тинство, разумех дела Твоя, и прославих Твое Божество.
Страстей моих смущение, кормчию рождшая Господа, и бурю утиши моих прегрешений, Богоневестная.
Милосердия Твоего бездну призывающу подаждь ми, яже благосердаго рождшая, и Спаса всех поющих Тя.
Наслаждающеся, Пречистая, Твоих дарований, благодарственное воспеваем пение, ведуще Тя Богоматерь.
Слава: На одре болезни моея и немощи низлежащу ми, яко благолюбива, помози Богородице, едина Приснодево.
И ныне: Надежду и утверждение,и спасения стену недвижимую имуще Тя, Всепетая, неудобства всякаго избавляемся.

Песнь 5
Ирмос: Просвети нас повелении Твоими, Господи,и мышцею Твоею высокою, Твой мир подаждь нам, Человеколюбче.
Исполни, Чистая, веселия сердце мое, Твою нетленную дающи радость, веселия рождшая виновнаго.
Избави нас от бед,Богородице Чистая, вечное рождши избавление, и мир всяк ум преимущий.
Слава: Разреши мглу прегрешений моих, Богоневесто, просвещением Твоея светлости, Свет рождшая Божественный и превечный.
И ныне: Исцели, Чистая, души моея неможение, посещения Твоего сподобльшая, и здравие молитвами Твоими подаждь ми.

Песнь 6
Ирмос: Молитву пролию ко Господуи Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.
Смерти и тли яко спасл есть, Сам Ся издав смерти, тлением и смертию мое естество ято бывшее, Дево, моли Господа и Сына Твоего врагов злодействия мя избавити.
Предстательницу Тя живота вем, и хранительницу тверду, Дево, и напастей решащу молвы, и налоги бесов отгоняющу: и молюся всегда от тли страстей моих избавити мя.
Слава: Яко стену прибежища стяжахом, и душ всесовершенное спасение, и пространство в скорбех, Отроковице, и просвещением Твоим присно радуемся. О Владычице и ныне нас от страстей и бед спаси.
И ныне: На одре ныне немощствуяй лежу, и несть исцеления плоти моей, но Бога и Спаса миру, и Избавителя недугов рождшая, Тебе молюся Благой: от тли недуг возстави мя.

Кондак, глас 6

        Предстательство христиан непостыдное, ходатайство ко Творцу непреложное, не презри грешных молений гласы, но предвари яко Благая на помощь нас, верно зовущих Ти: ускори на молитву и потщися на умоление, предстательствующи присно, Богородице, чтущих Тя.

Стихира, глас той же

Не ввери мя человеческому предстательству, Пресвятая Владычице, но приими моление раба Твоего: скорбь бо обдержит мя, терпети не могу демонскаго стреляния, покрова не имам, ниже где прибегну окаянный, всегда побеждаем, и утешения не имам, разве Тебе, Владычице мира, упование и Предстательство верных, не презри моление мое, полезно сотвори.

Акафист
Кондак 1

Возбранный Воеводо и Господи, ада победителю,яко избавлься от вечныя смерти, похвальная восписую Ти, создание и раб Твой: но яко имеяй милосердие неизреченное, от всяких мя бед свободи, зовуща: Иисусе, Сыне Божий,помилуй мя.

Икос 1

Ангелов Творче и Господи сил, отверзи ми недоуменный ум и язык на похвалу пречистаго Твоего имене, якоже глухому и гугнивому древле слух и язык отверзл еси, и глаголаше зовый таковая:
Иисусе пречудный, Ангелов удивление; Иисусе пресильный, прародителей избавление.
Иисусе пресладкий, патриархов величание; Иисусе преславный, царей укрепление.
Иисусе прелюбимый, пророков исполнение; Иисусе предивный, мучеников крепосте.
Иисусе претихий, монахов радосте; Иисусе премилостивый, пресвитеров сладосте.
Иисусе премилосердый, постников воздержание; Иисусе пресладостный, преподобных радование.
Иисусе пречестный, девственных целомудрие; Иисусе предвечный, грешников спасение.
Иисусе, Сыне Божий, помилуй мя.

Кондак. 2

Видя вдовицу, зельне плачущу, Господи, якоже бо тогда умилосердився, сына ея на погребение несома воскресил еси: сице и о мне умилосердися, Человеколюбче, и грехми умерщвленную мою душу воскреси, зовущую: Аллилуйа.

Икос 2

Разум неуразуменный разумети Филипп ища, Господи, покажи нам Отца, глаголаше; Ты же к нему: толикое время сый со Мною, не познал ли еси, яко Отец во Мне, и Аз во Отце есмь? Темже, Неизследованне, со страхом зову Ти:
Иисусе, Боже предвечный; Иисусе, Царю пресильный.
Иисусе, Владыко долготерпеливый; Иисусе, Спасе премилостивый.
Иисусе, хранителю мой преблагий; Иисусе, очисти грехи моя.
Иисусе, отыми беззакония моя; Иисусе, отпусти неправды моя.
Иисусе, надежде моя, не остави мене; Иисусе, помощниче мой, неотрини мене.
Иисусе, Создателю мой, не забуди мене; Иисусе, Пастырю мой, не погуби мене.
Иисусе, Сыне Божий, помилуй мя.

Кондак 3

Силою свыше апостолы облекий, Иисусе, во Иерусалиме седящия, облецы и мене, обнаженного от всякого благотворения, теплотою Духа Святаго Твоего, и даждь ми с любовию пети Тебе: Аллилуиа.

Икос 3

Имеяй богатство милосердия, мытари и грешники, и неверныя призвал еси, Иисусе; не презри и мене ныне, подобнаго им, но яко многоценное миро, приими песнь сию:
Иисусе, сило непобедимая; Иисусе, милосте безконечная.
Иисусе, красото пресветлая; Иисусе, любы неизреченная.
Иисусе, Сыне Бога Живаго; Иисусе, помилуй мя грешнаго.
Иисусе, услыши мя, в беззакониих зачатаго; Иисусе, очисти мя, во гресех рожденнаго.
Иисусе, научи мя непотребнаго; Иисусе, освети мя темнаго.
Иисусе, очисти мя сквернаго; Иисусе, возведи мя блуднаго.
Иисусе, Сыне Божий, помилуй мя.

Кондак 4

Бурю внутрь имеяй помышлений сумнительных, Петр утопаше; узрев же во плоти Тя суща, Иисусе, и по водам ходяща, позна Тя Бога истиннаго, и руку спасения получив, рече: Аллилуиа.

Икос 4

Слыша слепый мимоходяща Тя, Господи, путем, вопияше: Иисусе, Сыне Давидов, помилуй мя! И, призвав, отверзл еси очи его. Просвети убо милостию Твоею очи мысленныя сердца и мене, вопиюща Ти и глаголюща:
Иисусе, вышних Создателю; Иисусе, нижних Искупителю.
Иисусе, преисподних потребителю; Иисусе, всея твари украсителю.
Иисусе, души моея утешителю; Иисусе, ума моего просветителю.
Иисусе, сердца моего веселие; Иисусе, тела моего здравие.
Иисусе, Спасе мой, спаси мя; Иисусе, свете мой, просвети мя.
Иисусе, муки всякия избави мя; Иисусе, спаси мя недостойнаго.
Иисусе, Сыне Божий, помилуй мя.

Кондак 5

Боготочною Кровию якоже искупил еси нас древле от законныя клятвы, Иисусе: сице изми нас от сети, еюже змий запят ны страстьми плотскими, и блудным наваждением, и злым унынием, вопиющия Ти: Аллилуиа.

Икос 5

Видевше отроцы еврейстии во образе человечестем Создавшаго рукою человека, и Владыку разумевше Его, потщашася ветвьми угодити Ему, осанна вопиюще. Мы же песнь приносим Ти, глаголюще:
Иисусе, Боже истинный; Иисусе, Сыне Давидов.
Иисусе, Царю преславный; Иисусе, Агнче непорочный.
Иисусе, Пастырю предивный; Иисусе, хранителю во младости моей.
Иисусе, кормителю во юности моей; Иисусе, похвале в старости моей.
Иисусе, надежде в смерти моей; Иисусе, животе по смерти моей.
Иисусе, утешение мое на суде Твоем; Иисусе, желание мое, не посрами мене тогда.
Иисусе, Сыне Божий, помилуй мя.

Кондак 6

Проповедник богоносных вещание и глаголы исполняя, Иисусе, на земли явлься и с человеки Невместимый пожил еси, и болезни наша подъял еси, отонюдуже ранами Твоими мы исцелевше, пети павыкохом: Аллилуиа.

Икос 6

Возсия вселенной просвещение истины Твоея, и отгнася лесть бесовская: идоли бо, Спасе наш, не терпяще Твоея крепости, падоша. Мы же, спасение получивше, вопием Ти:
Иисусе, Истине, лесть отгонящая; Иисусе, свете, превышший всех светлостей.
Иисусе, Царю, премогаяй всех крепости; Иисусе, Боже, пребывая и в милости.
Иисусе, Хлебе животный, насыти мя алчущаго; Иисусе, источниче разума, напой мя жаждущаго.
Иисусе, одеждо веселия, одей мя тленнаго; Иисусе, покрове радости, покрый мя недостойнаго.
Иисусе, подателю просящим, даждь ми плач за грехи моя; Иисусе, обретение ищущим, обрящи душу мою.
Иисусе, отверзителю толкущим, отверзи сердце мое окаянное; Иисусе, Искупителю грешных, очисти беззакония моя.
Иисусе, Сыне Божий, помилуй мя.

Кондак 7

Хотя сокровенную тайну от века открыти, яко овча на заколение веден был еси, Иисусе, и яко агнец прямо стригущаго его безгласен, и яко Бог из мертвых воскресл еси, и со славою на небеса вознеслся еси, и нас совоздвигл еси, зовущих: Аллилуиа.

Икос 7

Дивную показа тварь, явлейся Творец нам: без семене от Девы воплотися, из гроба, печати не рушив, воскресе, и ко апостолом, дверем затворенным, с плотию вниде. Темже чудящеся, воспоим:
Иисусе, Слове необыменный; Иисусе, Слове несоглядаемый.
Иисусе, сило непостижимая; Иисусе, мудросте недомыслимая.
Иисусе, Божество неописанное; Иисусе, господство неизсчетное.
Иисусе, царство непобедимое; Иисусе, владычество безконечное.
Иисусе, крепосте высочайшая; Иисусе, власте вечная.
Иисусе, Творче мой, ущедри мя; Иисусе, Спасе мой, спаси мя.
Иисусе, Сыне Божий, помилуй мя.

Кондак 8

Странно Бога вочеловечшася видяще, устранимся суетнаго мира и ум на Божественная возложим. Сего бо ради Бог на землю сниде, да нас на небеса возведет, вопиющих Ему: Аллилиуиа.

Икос 8

Весь бе в нижних, и вышних никакоже отступи Неизсчетный, егда волею нас ради пострада, и смертию Своею нашу смерть умертви, и воскресением живот дарова поющим:
Иисусе, сладосте сердечная; Иисусе, крепосте телесная.
Иисусе, светлосте душевная; Иисусе, быстрото умная.
Иисусе, радосте совестная; Иисусе, надежде известная.
Иисусе, памяте предвечная; Иисусе, похвале высокая.
Иисусе, славо моя превознесенная; Иисусе, желание мое, не отрини мене.
Иисусе, Пастырю мой, взыщи мене; Иисусе, Спасе мой, спаси мене.
Иисусе, Сыне Божий, помилуй мя.

Кондак 9

Все естество ангельское безпрестани славит пресвятое Имя Твое, Иисусе, на небеси. Свят, Свят, Свят, вопиюще; мы же грешнии на земли бренными устнами вопием: Аллилуиа.

Икос 9

Ветия многовещанныя якоже рыбы безгласныя видим о Тебе, Иисусе, Спасе наш: недоумеют бо глаголати, како Бог непреложный и человек совершенный пребываеши? Мы же таинству дивящеся, вопием верно:
Иисусе, Боже предвечный; Иисусе, Царю царствующих.
Иисусе, Владыко владеющих; Иисусе, Судие живых и мертвых.
Иисусе, надежде ненадежных; Иисусе, утешение плачущих.
Иисусе, славо нищих; Иисусе, не осуди мя по делом моим.
Иисусе, очисти мя по милости Твоей; Иисусе, отжени от мене уныние.
Иисусе, просвети моя мысли сердечныя; Иисусе, даждь ми память смертную.
Иисусе, Сыне Божий, помилуй мя.

Кондак 10

Спасти хотя мир, Восточе востоком, к тем ному западу, естеству нашему пришед, смирился еси до смерти; темже превознесеся Имя Твое паче всякаго имене, и от всех колен небесных и земных слышиши: Аллилуиа.

Икос 10

Царю Превечный, Утешителю, Христе истинный, очисти ны от всякия скверны, якоже очистил еси десять прокаженных, и исцели ны, якоже исцелил еси сребролюбивую душу Закхеа мытаря, да вопием Ти, во умилении зовуще:
Иисусе, сокровище нетленное; Иисусе, богатство неистощимое.
Иисусе, пище крепкая; Иисусе, питие неисчерпаемое.
Иисусе, нищих одеяние; Иисусе, вдов заступлепие.
Иисусе, сирых защитиниче; Иисусе, труждающихся помоще.
Иисусе, странных наставниче; Иисусе, плавающих кормчий.
Иисусе, бурных отишие; Иисусе Боже, воздвигни мя падшаго.
Иисусе, Сыне Божий, помилуй мя.

Кондак 11

Пение всеумиленное приношу Ти недостойный, вопию Ти яко хананеа: Иисусе, помилуй мя; не дщерь бо, но плоть имам, страстьми люте бесящуюся и яростию палимую, и исцеление даждь вопиющу Ти: Аллилуиа.

Икос 11

Светоподательна светильника сущим во тьме неразумия, прежде гоняй Тя Павел, богоразумного гласа силу внуши и душевную быстроту уясни; сице и мене темныя зеницы душевныя просвети, зовуща:
Иисусе, Царю мой прекрепкий; Иисусе, Боже мой пресильный.
Иисусе, Господи мой пребезсмертный; Иисусе, Создателю мой преславный.
Иисусе, Наставниче мой предобрый; Иисусе, Пастырю мой прещедрый.
Иисусе, Владыко мой премилостивый; Иисусе, Спасе мой премилосердый.
Иисусе, просвети моя чувствия, потемненная страстьми; Иисусе, исцели мое тело, острупленное грехми.
Иисусе, очисти мой ум от помыслов суетных; Иисусе, сохрани сердце мое от похотей лукавых.
Иисусе, Сыне Божий, помилуй мя.

Кондак 12

Благодать подаждь ми, всех долгов решителю, Иисусе, и приими мя кающася, якоже приял еси Петра, отвергшагося Тебе, и призови мя унывающаго, якоже древле Павла, гоняща Тя, и услыши мя, вопиюща Ти: Аллилуиа.

Икос 12

Поюще Твое вочеловечение, восхваляем Тя вси, и веруем со Фомою, яко Господь и Бог еси, седяй со Отцем и хотяй судити живым и мертвым. Тогда убо сподоби мя деснаго стояния, вопиющаго:
Иисусе, Царю предвечный, помилуй мя; Иисусе, цвете благовонный, облагоухай мя.
Иисусе, теплото любимая, огрей мя; Иисусе, храме предвечный, покрый мя.
Иисусе, одеждо светлая, украси мя; Иисусе, бисере честный, осияй мя.
Иисусе, каменю драгий, просвети мя; Иисусе, солнце правды, освяти мя.
Иисусе, свете святый, облистай мя; Иисусе, болезни душевныя и телесныя избави мя.
Иисусе, из руки сопрогивныя изми мя; Иисусе, огня негасимаго и прочих вечных мук свободи мя.
Иисусе, Сыне Божий, помилуй мя.

Кондак. 13

О, пресладкий и всещедрый Иисусе! Приими ныне малое моление сие наше, якоже приял еси вдовицы две лепте, и сохрани достояние Твое от враг видимых и невидимых, от нашествия инплеменник, от недуга и глада, от всякия скорби и смертоносныя раны, и грядущия изми муки всех, вопиющих Ти: Аллилуия. (Трижды)

Икос 1

Ангелов Творче и Господи сил, отверзи ми недоуменный ум и язык на похвалу пречистаго Твоего имене, якоже глухому и гугнивому древле слух и язык отверзл еси, и глаголаше зовый таковая:
Иисусе пречудный, Ангелов удивление; Иисусе пресильный, прародителей избавление.
Иисусе пресладкий, патриархов величание; Иисусе преславный, царей укрепление.
Иисусе прелюбимый, пророков исполнение; Иисусе предивный, мучеников крепосте.
Иисусе претихий, монахов радосте; Иисусе премилостивый, пресвитеров сладосте.
Иисусе премилосердый, постников воздержание; Иисусе пресладостный, преподобных радование.
Иисусе пречестный, девственных целомудрие; Иисусе предвечный, грешников спасение.
Иисусе, Сыне Божий, помилуй мя.
Кондак 1

Возбранный Воеводо и Господи, ада победителю,яко избавлься от вечныя смерти, похвальная восписую Ти, создание и раб Твой: но яко имеяй милосердие неизреченное, от всяких мя бед свободи, зовуща: Иисусе, Сыне Божий,помилуй мя.

Песнь 7
Ирмос: От Иудеи дошедше отроцы, в Вавилоне иногда верою Троическою пламень пещный попраша, поюще отцев Боже, благослвен еси.
Наше спасение якоже восхотел еси Спасе, устроити, во утробу Девыя вселился еси, Юже миру предстательницу показал еси отец наших Боже, благословен еси.
Водителя милости, Егоже родила еси, Мати чистая, умоли избавитися от прегрешений и душевных скверн, верою зовущим: отец наших Боже, благословен еси.
Слава: Сокровище спасения, и источник нетления, Тя рождшую, и столп утверждения, и дверь покаяния, зовущим показал еси отец наших Боже, благословен еси.
И ныне: Телесныя слабости, и душевныя недуги, Богородительнице, любовию приступающих к крову Твоему, Дево, исцелити сподоби, Спаса Христа нам рождшая.

Песнь 8
Ирмос: Царя Небеснаго, Егоже поют вои Ангельстии, хвалите и превозносите во вся веки.
Помощи, яже от Тебе требующия не презри, Дево, поющия и превозносящия Тя во веки.
Неможение души моея исцеляеши, и телесныя болезни, Дево: да Тя прославлю, Чистая, во веки.
Слава: Исцелений богатство изливаеши, верно поющим Тя, Дево, и превозносящим неизреченное Твое рождество.
И ныне: Напастей Ты прилоги отгоняеши, и страстей находы, Дево: темже Тя поем во вся веки.

Песнь 9
Ирмос: Воистину Богородицу Тя исповедуем, спасеннии Тобою, Дево Чистая, с безплотными лики Тя величающе.
Тока слез моих не отвратися, Яже от всякаго лица всяку слезу отъемшаго, Дево, Христа рождшая.
Радости мое сердце исполни, Дево, Яже радости приемшая исполнение, греховную печаль потребляющи.
Пристанище и предстательство к Тебе прибегающих буди, Дево, и стена нерушимая, прибежище же и покров и веселие.
Слава: Света Твоего зарями просвети, Дево, мрак неведения отгоняющи, благоверно Богородицу Тя исповедающих.
И ныне: На месте озлобления немощи смирившагося, Дево, исцели из нездравия во здравие претворяющи.

        Достойно есть яко воистину блажити Тя Богородицу, Присноблаженную и Пренепорочную и Матерь Бога нашего. Честнейшую Херувим и славнейшую без сравнения Серафим, без истления Бога Слова рождшую, сущую Богородицу Тя величаем.

И поем настоящие Богородичны, глас 2:

Вышшую небес и чистшую светлостей солнечных, избавльшую нас от клятвы Владычицу мира песньми почтим.
От многих моих грехов немощствует тело, немощствует и душа моя; к Тебе прибегаю, Благодатней, надеждо ненадежных, Ты ми помози.
Владычице и Мати Избавителя, приими моление недостойных раб Твоих, да ходатайствуеши к Рождшемуся от Тебе: о,Владычице мира, буди Ходатаица!
Поем прилежно Тебе песнь ныне всепетой Богородице, радостно: со Предтечею и всеми святыми моли,Богородице,еже ущедрити ны.
Вся Ангелов воинства,Предтече Гоподень, апостолов двоенадесятице, святии вси с Богородицею, сотворите молитву, во еже спастися нам.

Прокимен, глас 7: Возлюблю Тя, Господи, Крепосте моя, Господь утверждение мое.
Стих: Бог мой, помощник мой, и уповаю на него.

К коринфяном послания святаго апостола Павла чтение.
(зач. 153; 1 Кор. 12,27- 13,8)

        Братие, вы есте Тело Христово, и уди от части. И овы убо положи Бог в Церкви первее апостолов, второе пророков, третие учителей, потом же силы, таже дарования исцелений, заступления, правления, роди языков. Еда вси апостоли? еда вси пророцы? еда вси учители? еда вси силы? еда вси дарования имут исцелений? еда вси языки глаголют? еда вси сказуют? Ревнуйте же дарований больших: и еще по превосхождению путь вам показую. Аще языки человеческими глаголю и Ангельскими, любве же не имам, бых (яко) медь звенящи или кимвал звяцаяй. И аще имам пророчество, и вем тайны вся и весь разум; и аще имам всю веру, яко и горы преставляти, любве же не имам, ничтоже есмь. И аще раздам вся имения моя, и аще предам тело мое, во еже сожещи е, любве же не имам, никая польза ми есть. Любы долготерпит, милосердствует: любы не завидит, любы не превозносится, не гордится, Ни безчинствует, не ищет своих си, не раздражается, не мыслит зла, Не радуется о неправде, радуется же о истине. Вся любит, всему веру емлет, вся уповает, вся терпит. Любы николиже отпадает.
Алилуйя, глас 8:
Стих I:
Возлюбите Господа вси преподобнии Его.
Стих 2: Яко истины взыскает Господь.

От Иоанна Святаго Евангелия чтение.
(зач.51;Ин., 15, 9-17)

        Рече Господь Своим учеником: Якоже возлюби Мя Отец, и Аз возлюбих вас: будите в любви Моей. Аще заповеди Моя соблюдете, пребудете в любви Моей: якоже Аз заповеди Отца Моего соблюдох и пребываю в Его любви. Сия глаголах вам, да радость Моя в вас будет, и радость ваша исполнится. Сия есть заповедь Моя, да любите друг друга, якоже возлюбих вы. Больши сея любве никтоже имать, да кто душу свою положит за други своя. Вы друзи Мои есте, аще творите, елика Аз заповедаю вам. Не к тому вас глаголю рабы, яко раб не весть, что творит Господь его: вас же рекох други, яко вся, яже слышах от Отца моего, сказах вам. Не вы Мене избрасте, но Аз избрах вас, и положих, да вы идете, и плод принесете, и плод ваш пребудет: да егоже аще просите от Отца во Имя Мое, даст вам. Си заповедаю вам, да любите друг друга.

Ектения сугубая

Диакон: Помилуй нас, Боже, по велицей милости Твоей, молим Ти ся, услыши и помилуй.
Хор: Господи, помилуй (трижды, на каждое прошение).
Еще молимся о Великом Господине и Отце нашем Святейшем Патриархе Алексии, и всей во Христе братии нашей.
Еще молимся о Богохранимей стране нашей и о спасении ея, да тихое и безмолвное житие поживем во всяком благочестии и чистоте.
Еще молимся о блаженных и приснопамятных создателех святого храма сего, и о всех прежде почивших отцех и братиях, зде лежащих и повсюду, православных.
Еще молимся о милости, жизни, мире, здравии, спасении, посещении, прощении и оставлении грехов рабов Божиих, братии святаго храма сего и Спасскаго Братства нашего.
Заповедь новую Твоим учеником, еже любити друг друга давый, Владыко, обнови сию благодатию Пресвятаго Твоего Духа в душах и сердцах наших, молим Ти ся, услыши и милостивно помилуй.
Тако в нас Твою любовь всели, Всещедрый Господи, еже неточию братию и други, но и врагов наших истинно любити, и ненавидящим нас благотворити, и о спасении их искренно молитися, просим Тя, скоро услыши и яко Благосерд помилуй.
Мир и благочестие утверди в земли нашей и избави нас от всех навет вражиих, бед и напастей, и не предаждь нас в попрание и разорение врагом и супостатом нашим, Господи, но скоро услыши и милостивно помилуй.
Премени всю скорбь, и сетование, и бедствование наше на радость и веселие и твердый мир, и мужественных и великодушных, неустрашимых и непреборимых от всех вражиих наветов всегда сотвори, Всесильный Царю, скоро услыши и помилуй.
Еще молимся о еже сохранитися святым храмом нашим и граду сему и всякому граду и стране от глада, губительства, труса, потопа, огня, меча, нашествия иноплеменников и междоусобныя брани, о еже милостиву и благоуветливу быти Благому и Человеколюбивому Богу нашему, отвратити всякий гнев на ны движимый и избавити ны от належащаго и праведнаго Своего прощения и помиловати ны.
Еще молимся за всю братию и за вся православный христианы.
Иерей: Услыши ны, Боже, Спасителю наш, упование всех концов земли и сущих в море далече, и милостив, милостив буди, Владыко, о гресех наших и помилуй пас.
Хор: Аминь.
Диакон: Господу помолимся.
Хор: Господи, помилуй.

Молитва:

        Владыко Господи, Всемилостиво Спасе наш, источниче жизни и безсмертия, Ты еси Любовь и Истина, милости бесконечныя и прощения грехов Податель! Благодарим Тя о многих щедротах Твоих, яже излиял еси на нас в мимошедшее время живота нашего. Молим Тя, всещедрый Господи! Подаждь свыше благая Твоя всем людем Твоим, здравие же, спасение и во всем благое поспешение. Церковь Твою святую, град сей и вся грады и страны от всякаго злаго обстоя ния избави, мир и безмятежиетем даруй.
        Господи Иисусе Христе, молитвами Пречистыя Матере Твоея, Преблагословенныя Владычицы нашея Богородицы и Приснодевы Марии и всех святых Твоих, от века Тебе угодивших и в последняя времена Тебе послуживших, за Имя Твое Святое многия и тяжкия гонения претерпевших и даже до смерти пострадавших, помилуй и спаси нас, грешных и непотребных, призри в милости на немощныя и недостойныя рабы Твоя. Се бо злая, нечистая и лукавая века сего обстоят нас, мы же в оскудении веры и любве не возможем противостати им, аще не Ты явиши нам благодатную помощь Твою. Умножи в нас веру, Господи, соедини нас друг другу и Церкви Твоей Святей в единомыслии и любви, отверзи духовныя очи наша, и очисти сердца наша во еже не земная, греховная и тленная желати, но горняя и вечная мудрствовати, и к Царству Твоему Небесному всем сердцем стремитися. Даруй нам зрение грехов наших и покаяние. Даждь нам смирение, кротость и мужество. У крепи нас силою Твоею, Господи, да пребудем верными Тебе до смерти, аще и последний рабы Твои есмы. Ты бо еси заступление и победа, радость и спасение уповающим на Тя, и Тебе славу возсылаем со Отцем и Святым Духом, ныне и присно и во веки веков.
Хор: Аминь.

Иерей: Слава Тебе Богу, Благодателю нашему, во веки веков.

Слава в вышних Богу, и на земли мир, в человецех благоволение. Хвалим Тя, благословим Тя, кланяем Ти ся, славословим Тя, благодарим Тя, великия ради славы Твоея. Господи Царю Небесный, Боже Отче Вседержителю, Господи Сыне единородный Иисусе Христе, и Святый Душе. Господи Боже, Агнче Божий, Сыне Отечь, вземляй грех мира, помилуй нас: вземляй грехи мира, приими молитву нашу: седяй одесную Отца, помилуй нас. Яко Ты еси един свят. Ты еси един Господь, Иисус Христос, во славу Бога Отца, аминь.
На всяк день благословлю Тя, и восхвалю Имя Твое во веки и в век века.
Сподоби, Господи в день сей без греха сохранитися нам. Благословен еси, Господи, Боже отец наших, и хвально и прославлено Имя Твое во веки, аминь.
Буди, Господи милость Твоя на нас, якоже уповахом на Тя.
Благословен еси, Господи, научи мя оправданием Твоим (трижды).
Господи, прибежище был еси нам в род и род. Аз рех: Господи, помилуй мя, исцели душу мою, яко согреших Тебе.
Господи, к Тебе прибегох, научи мя творити волю Твою, яко Ты еси Бог мой: яко у Тебе источник живота, во свете Твоем узрим свет. Пробави милость Твою ведущим Тя.
Святый Боже, Святый Крепкий, Святый Безсмертный, помилуй нас (трижды).
Слава, и ныне: Святый Безсмертный, помилуй нас. Святый Боже, Святый Крепкий, Святый Безсмертный, помилуй нас.

Тропарь, глас 6

Господи сил, с нами буди, иного бо разве Тебе, Помощника в скорбсх не имамы; Господи сил, помилуй нас (дважды).
Хвалите Бога во святых Его, хвалите Его во утвержении силы Его.
Господи сил, с нами буди:
Хвалите Его на силах Его, хвалите Его по множеству величествия Его.
Господи сил, с нами буди:
Хвалите Его во гласе трубнем, хвалите Его во псалтири и гуслех.
Господи сил, с нами буди:
Хвалите Его в тимпане и лицех, хвалите Его во струнах и органе.
Господи сил, с нами буди:
Хвалите Его в кимвалех доброгласных, хвалите Его в кимвалех восклицания, всякое дыхание да хвалит Господа.
Господи сил, с нами буди:

Таже оба лика, сошедшеся вкупе поют:

Хвалите Бога во святых Его, хвалите Его во утвержении силы Его.
Господи сил, с нами буди:
Слава Отцу, и Сыну, и Святому Духу.
Господи, аще не быхом святыя Твоя имели молитвенники, и благостыню Твою, милующую нас, како смели быхом. Спасе, пети Тя, Егоже славословят непрестанно ангели? Сердцеведче, пощади души наша.
И ныне, и присно, и во веки веков. Аминь.
Многая множества моих, Богородице, прегрешений, к Тебе прибегох, Чистая, спасения требуя: посети немощствующую мою душу, и моли Сына Твоего, и Бога нашего, дати ми оставление, яже содеях лютых, едина благословенная.
Всесвятая Богородице, во время живота моего не остави мене, человеческому предстательству не ввери мя; но Сама заступи и помилуй мя.
Все упование мое на Тя возлагаю: Мати Божия, сохрани мя под кровом Твоим.

Диакон: Премудрость.
Иерей: Пресвятая Богородице, спаси нас.
Хор: Честнейшую Херувим и Славнейшую без сравнения Серафим, без истления Бога Слова рождшую Сущую Богородицу Тя величаем.
Иерей: Слава Тебе, Христе Боже, Упование наше, слава Тебе.
Хор: Слава Отцу и Сыну и Святому Духу и ныне и присно и во веки веков. Аминь.
Господи помилуй (трижды), благослови.

Отпуст.
Во время пения стихир дается крест.