Выписка из журнала заседания Священного Синода от
13 апреля 2021 года под председательством
Святейшего Патриарха Московского и всея Руси Кирилла
СЛУШАЛИ: Рапорты Преосвященного митрополита Петрозаводского и Карельского Константина, председателя Синодальной богослужебной комиссии, о представлении на утверждение Священного Синода ряда тропарей, кондаков и молитв святым угодникам Божиим. ПОСТАНОВИЛИ: Утвердить к общецерковному богослужебному употреблению:
Месяца ноября в 6-й день Священномученика Никиты, епископа Орехово-Зуевскаго Тропaрь, глaс 5:
Отче священномучениче Никито,/ ты, в годину лютых гонений/ святительский сан восприем,/ во благочестии добре подвизался еси,/ последи же, яко юрод Христа ради поживый,/ венцем мученическим украсился еси./ Сего ради моли Всеблагаго Бога/ в вере истинней нам утвердитися/ и спастися душам нашим.
Кондак, глас 4:
Днесь радостно ликует град Орехово-Зуево,/ прославляя святителя своего,/ священномученика Никиту,/ той бо, нищету Христову возлюбив,/ правило веры и образ милосердия яви./ Ныне же Престолу Божию предстоит/ и молится о душах наших.
Месяца августа в 13-й день Священномученика Серафима, епископа Дмитровскаго Тропaрь, глaс 4:
Днесь вернии людие града Дмитрова светло празднуют/ и вся Церковь Русская духовно торжествует,/ восхваляюще тя, священномучениче Серафиме,/ ты бо, заточение и страдания лютая претерпев,/ смерть мученическую за Христа приял еси/ и Царство Небесное наследовал еси./ Темже, Престолу Пресвятыя Троицы предстоя,/ моли грехов оставление даровати нам,/ благочестно совершающим святую память твою.
Кондак, глас 2:
Воине Христов добропобедный,/ яко серафим пламенный,/ любовию к Богу возгорелся еси,/ в посте и молитве подвизаяся,/ Саровскому чудотворцу подражал еси,/ заповеди же Божия исполняя,/ истинней вере люди наставлял еси,/ страдания за Христа претерпевая,/ единство церковное хранити призывал еси./ Темже, сошедшеся в память твою,/ верою и любовию вопием ти:/ радуйся, священномучениче Серафиме, Церкве Русския похвало и украшение.
Месяца декабря во 2-й день Священномученика Константина Некрасова Тропaрь, глaс 3:
Образ верным во святем житии твоем являя,/ священномучениче Константине,/ Христа ради пострадал еси даже до смерти,/ темже моли Милостиваго Бога/ в вере Православней нас утвердити/ и от смертоносных страстей избавити.
Кондак, глас 8:
Святый священномучениче Константине,/ изгнания, темничная заключения/ и от безбожных беззаконное убиение/ за Христа претерпел еси./ Страждущих от винопития исцеляя,/ воздержанию, чистоте и благочестию научая,/ ныне же Христу Богу за всех молися/ даровати нам грехов оставление// и душам нашим спасение
Месяца ноября в 27-день Преподобномученика Никона (Беляева) Тропaрь, глaс 4:
Преподобномучениче Никоне/ Учителю премудрый и пастырю добрый,/ ты, во дни гонений, на Церковь Русскую воздвигнутых,/ стадо Христово добре сохранити потщался еси,/ проповедании верныя укрепляя/ и к Царству Небесному управляя./ Темже, лютыми мучители смерти предан быв,/ ныне пред Престолом Божиим предстоиши,/ преподобномучениче Никоне,/ венец победный от Христа Бога приял еси,/ Егоже моли Отечеству нашему в мире сохранитися/ и спастися душам нашим.
Кондак, глас 7:
Пастыреначальника Христа спасительныя заповеди возлюбивый,/ данную ти паству добре упасл еси,/ преподобномучениче Никоне,/ и за Христа исповедания веры страдания и смерть приял еси./ Сего ради, яко имеяй дерзновение ко Господу,/ моли даровати нам мир и милость велию.
Месяца апреля в 20-й день Священноисповедника Феодосия, епископа Коломенскаго и Бронницкаго Тропaрь, глaс 4:
Днесь торжествует Коломна славная,/ величающи святителя своего,/ Феодосия предивнаго,/ в годину лютую гонения безбожнаго/ Христа небоязненно проповедавшаго/ и подвиг страдания и терпения совершившаго./ Темже и мы, чада твоя, прославляем тя, исповедниче,/ яко пастыря добраго и Православныя веры поборника,/ со умилением и любовию зовуще:/ моли Человеколюбца Бога,/ да спасет души наша.
Кондак, глас 2:
Яко сокровище пребогатое,/ честныя мощи твоя обретошася,/ священноисповедниче отче Феодосие,/ ты бо, во дни гонения безбожнаго/ страдания Христа ради мужественне претерпел еси./ Ныне же в Небесных селениих пребываеши/ и молиши Человеколюбца Бога,/ да спасет души наша.
|